KTS Bodbreef Twentaal Agenda Niejs Downloads Kiekt hier ok es Twents, niks mis met Contact

Historie

Op 21 november 1975 hebt 'n aantal leu in Hengel 'n Kreenk vuur de Twentse Sproak opricht, met het idee: loa-w met mekaar wat doon vuur de Twentse sproak. Net as no, was der ok toen a proat van dat het met 't Twents nich best gung. Mer in dee vergangen joarn is der wa heel wat gebuurd. Um mer es 'n paar dinge te neumen:

- Duur toodoon van 'n Kreenk is der 'n paar keer nen anzet west um tut eene spelling te kommen van het Twents. In 2009 is doar 'n book oaver oetkömmen, woarin ok andacht vuur wat zaken van de grammatica.

- Ok hef de Kreenk duur 't joar hen heel wat kearkdeensten organiseerd in de modersproak, en aaltied op oecumenischen grondslag. No wördt dizze deensten a organiseerd boeten 'n Kreenk um, en zo mot het ok goan. De leu van 'n Kreenk, en meer benaamd het bestuur, nemt wa initiatief, mer de leu oet de strek zölf möt doar dan wieder met an 't weark.

- Zo is 't ok goan met het oetgevven van beuk in de modersproak. Leu van 'n Kreenk of Van Deinse en no van TwentseWelle begint woer met en dan nemt annere leu het oaver. Ieleu kent ammoal 'n Twentsen Almanak, den eerder a 'n Twentschen Almanak hetten. En ok 't Jaarboek Twente is al dik oaver de 50 nummers. Wieders de oetgifte van alle beuk van Anne van der Meiden, benaamd natuurlijk 'n Biebel, en de beuk van André Hottenhuis (zoas 'Wat niet in Dijkhuis staat', deel 1 en 2).

- Tot slot mot ok 't weark van de streektaalconsulenten wörden neumd. Gerrit Kraa begön der eertieds met, doarnoa kwam Bert Groothengel, dee 'n lesriege op hef zet veur de basisscholen. No steet Harry Nijhuis der vuur, met ziene mooie taalkamer in museum TwentseWelle.

As 't um 't Twents dialect gung, dan was 'n Kreenk vuur de Twentse Sproak der biej, en organiseren ok zölf nog van alles. Van slachtvisites tut nijoarsvisiten en van dialectmoand tut cursussen Twents. Thea Kroese hef doar in heer tied as directeur van Van Deinse, en ok no nog steeds, völ weark vuur verzet.

Op 21 november 2015 hef de KTS heur veertigjoarig bestoan gevierd met een receptie en een geweldig mooin feestoavend in het Parkgebouw Riessen.

In al dee achterliggende joarn is der zo heel wat weark gebuurd. Loa'w met mekaar verdan goan op dizze weg, en loa'w met oons allen der vuur zorgen dat der oaver 35 joar nog steeds Twents wördt proat en ok dat der nog steeds oaver het Twents wördt proat.

 

 

------------

ANDRÉ HOTTENHOES

André hef biej leamn heel wat betekent veur de Twentse sproak. Hee was de Twentse sproak. Hee kon op de veur hem zoa karakteristieke en humoristische wieze prachtige verhalen vertellen oaver de Twentenaar met ziene nukken en eigenaardigheden en de Twentse gebroeken. Ok hebt heel wat leu met völ plezier kunnen luusteren noar ziene prachtige leazingen (b.v. oaver de familienamen) dee hee oaveral in Twente hef gövven.

Neust alle beuk dee hee hef oetgömmen in de Twentse modersproak, har hee wekelijks zien artikel in de kraant, ‘Wat niet in Dijkhuis staat’.

André Hottenhoes, nen meesteretymoloog zonner flantuten.


André, Daankensweerd!